Daily Archives: March 18, 2015

HK Lies 12 hrs · 朝早食齊昕花生，晏晝收拾心情聽機管局興建機場第三條跑道。真正「朝花晚拾」。以下係一啲粗略嘅思考。 首先，一個 project 做定唔做，不外乎需要性、可行性同利弊。如果唔講道理，「我話做就做」，咁就講嚟都嘥氣。雖然現任政府本質上獨裁，但仍然好多人唔係咁諗。 講需要性，香港航空物流蓬勃多時但早已被鄰近地區追貼甚至爬頭。飽和丫嘛。咁總有人相信機場容量可以好似 harddisk 咁無限擴大，但全球物流需求係咪無止境上升？再講，人哋爬頭其中一個原因係香港收得貴。而機管局為咗起嘢仲要加價。咁，到底市場對香港機場需求會升定係跌？ 其次，大陸同新加坡齊齊喺航空物流業爭食。香港加入玩軍備競賽，猶如殺入紅海累鬥累。陣間廣州市委書記畀說話梁振英聽，破壞中港和諧，值得咩？ 又講可行性。中共人定勝天嘅信念，放諸香港一樣冇話唔得。中華白海豚短暫搬家日後返原地居住都諗得出咯，點樣搬海刨山簡直小兒科。不過講到日後起好，點樣解決同大陸空域嘅問題，對於提倡興建跑道嗰班嚟講，都係 none of their s business。 最後講利弊。大家聽到 1,415 億呢個數字已經拍晒檯，但一件事做唔做，係睇有冇賺，幾耐回本。機管局每年盈餘頂盡 100 億，咁做一個耗用盈餘 14 倍嘅資金去做一項投資，可以帶來幾多回報？如果你係 759 阿信屋由 0 到 1 咁做或者冇咩唔妥，但香港機場假假地都曾經係世界首屈一指嘅機場，多一條跑道可以賺多幾多？ 如果機管局本住人人為我、我為人人嘅精神，將跑道帶來嘅額外旅業或配套服務收益計埋落 business case度，咁條數都真係任佢篤。問題係，機管局本身資產負債表好人好姐變到面目全非，阿主席會唔會要交待？肯捱義氣做醜人，背後會唔會有啲不為人知嘅得著？ 而家大家嘅質疑，唔需要從環保、金錢或者技術問題出發。只需要簡單問：「第三條跑道，有咩用？」連要嚟做乜都說服唔到市民嘅話，係咪阿茂整餅，冇嗰樣整嗰樣？