史兄

兄史
10 hrs · Edited ·
【OK, history is JUST repeating itself】
1. 動用百億以上興建基建X
2. 基建X的效果成疑
3. 基建X的”成功”，必須得到內地或香港在制度上的合作／讓步
－－－
起唔起三跑？
有幸讀過幾年經濟學，喺書度偷過張五常少少思考方式。我問一個簡單問題：
起嚟做乜？
假設你乜嘢北飛南飛、航空領域問題徹底解決，真係有咁多飛機升降到，然後香港得到啲乜？
.
.
.
.
.
.
.
.
.
.
.
.
.
.
.
遊客，
遊客，
更多遊客。
無限嘅遊客。
我打上面幾行字，自己都忍唔住笑咗出嚟。
－－－
而家香港唔夠遊客咩？香港整體經濟乜仲有接待額外遊客嘅容量咩？
香港嘅問題，唔係demand-side嘅問題－即唔係唔夠需求，而係domestic supply-side－內部供應－出現咗樽頸。呢種樽頸已經具體咁顯現喺幾個好重要嘅指標：
－香港嘅失業率係3.3%，接近全民就業。近年約3%嘅失業率，係自97年以嚟嘅低位（我一度認為唐英年好快會死）。好多工等人做，食肆、酒店等旅遊相關業，缺人缺到七彩；呢幾年做工程、地盤，有少少經驗，轉工容易好爆。如果你想知請人有幾難，得閒落去茶記睇下，佢請洗碗同侍應請咗幾耐。值得留意嘅係，大概十年後，二戰後嬰兒退休潮出現，香港勞動人口會減少。到時有工無人做嘅情況會仲嚴重。
－商舖、工廈租升到七彩。空置率同租金反映真正用家剛性需求（價可能有炒賣）。唔好信我，信自己。你揀一區自己比較熟悉嘅，諗一諗，有幾多間舖頭十年前喺度、十年後仲生存緊。
幫我剪頭髮嘅，由金馬倫道地舖做師傅、搬去寶勒巷樓上舖租舖做老闆、加租搞到佢要去漢口道樓上舖同人夾份、再進化度佢只能夠借人地方剪同其他人拆賬。佢以前租嘅地方，分別變咗食肆、樓上商店同樓上商店。
－基建已經頂唔順。地鐵迫到爆，夜晚十點十一點都人頭湧湧；旺區嘅廁所唔外借；各種旅遊設施，一味係人，仲要係大陸佬。
我想講呀，我咁中意唐老鴨，香港迪士尼我只係去過三次，三次都係免費。除咗佢啲唐老鴨精品好醜，更重要嘅原因係：
你要我畀幾舊水入去同大陸佬一齊迫、仲要畀班仆街打尖，你無撚嘢呀嘛？
－－－
而家唔係我哋有好多吉舖、海洋公園有好多空纜車，我哋要吸引多啲遊客嚟；更加唔係有遊客嚟，但由於機場無位或過關時間太長，所以我哋要整大啲個機場，等遊客多啲嚟。
好心啦，起大個機場，啲遊客玩乜呀，度度咁迫，歡樂滿東華表演兩萬人搭一架地鐵咩（我哋而家日日做緊啦）？定係喺機場行完chanel同一排名牌店就搭原機走人？
對於高鐵、對於三跑，無論成功與否，結果只有仆街，同埋更仆街：
萬一吸引到好多人用。對香港內部資源嘅需求更大。唔夠人、唔夠地。於是咪輸入人材、繼續移山填海囉。你當班友話發展郊野公園係試水溫？你低能嫁？而家千鳩幾億起三跑都予取予攜，要喺大潭中間起樓，怕你乜嘢？
你放心，成功嘅機會好微好微（機場成功機會較大，大過高鐵好多好多好多。大概係40% vs 0.0001%嘅分別, and i am very serious about the %)……..不過，你知道失敗嘅後果，你寧願佢成功。
壞嘅情況係，無人用，要蝕。為咗回本、為咗條數靚啲，為咗輸少啲，放棄自己大部份嘅航空領域換取深圳少少（三跑），又或者容許內地喺香港進行一地兩檢（高鐵）。失敗咗，仲仆街，更大理由去輸入人材、移山填海，希望以supply creates demand。
最後，咁多基建再咁多超支，香港嗰七千億財政儲備，慢慢畀呢堆大白象食下又一舊、食下又一舊。一窮二白，香港政府要舉債渡日，到時內地買咗你90%嘅國債／區債，捉住你春袋（望望東江水呀陰公），畀你提名特首又如何、畀你獨立又如何？
1415億，
唔知以為係精虫數目。